ਨਵੀਂ ਦਿੱਲੀ: ਭਾਰਤੀ ਹਵਾਈ ਫ਼ੌਜ ਵਿੱਚ ਮਹਿਲਾਵਾਂ ਦੀ ਵਧ ਰਹੀ ਭੂਮਿਕਾ ਵਿਚਕਾਰ ਸਕਵਾਡਰਨ ਲੀਡਰ ਭਾਵਨਾ ਕਾਂਤ ਨੇ ਇੱਕ ਹੋਰ ਵੱਡੀ ਉਪਲਬਧੀ ਹਾਸਲ ਕੀਤੀ ਹੈ। ਉਹ ਗਵਾਲੀਅਰ ਸਥਿਤ Tactical Air Combat Development Establishment (TACDE) ਵਿੱਚ ਫਾਈਟਰ ਕੰਬੈਟ ਲੀਡਰ ਕੋਰਸ ਪੂਰਾ ਕਰਨ ਵਾਲੀ ਪਹਿਲੀ ਮਹਿਲਾ ਫਾਈਟਰ ਪਾਇਲਟ ਬਣ ਗਈ ਹੈ।

ਕਰੀਬ 20 ਹਫ਼ਤਿਆਂ ਦਾ ਇਹ ਕੋਰਸ ਭਾਰਤੀ ਹਵਾਈ ਫ਼ੌਜ ਦੇ ਸਭ ਤੋਂ ਚੁਣੌਤੀਪੂਰਨ ਟ੍ਰੇਨਿੰਗ ਪ੍ਰੋਗਰਾਮਾਂ ਵਿੱਚ ਸ਼ਾਮਲ ਹੈ। ਇਸ ਲਈ ਚੋਣ ਕੁਝ ਖਾਸ ਤਜਰਬੇਕਾਰ ਫਾਈਟਰ ਪਾਇਲਟਾਂ ਵਿੱਚੋਂ ਕੀਤੀ ਜਾਂਦੀ ਹੈ। ਕੋਰਸ ਪੂਰਾ ਕਰਨ ਤੋਂ ਬਾਅਦ ਪਾਇਲਟ ਜਟਿਲ ਹਵਾਈ ਲੜਾਕੂ ਮੁਹਿੰਮਾਂ ਦੀ ਯੋਜਨਾ ਬਣਾਉਣ ਅਤੇ ਉਨ੍ਹਾਂ ਦੀ ਅਗਵਾਈ ਕਰਨ ਲਈ ਤਿਆਰ ਹੁੰਦੇ ਹਨ।

TACDE ਵਿੱਚ ਪਾਇਲਟਾਂ ਨੂੰ ਹਵਾਈ ਜੰਗ ਦੀਆਂ ਆਧੁਨਿਕ ਰਣਨੀਤੀਆਂ, ਮਿਸ਼ਨ ਪਲਾਨਿੰਗ, ਹਵਾ-ਤੋਂ-ਹਵਾ ਅਤੇ ਹਵਾ-ਤੋਂ-ਜ਼ਮੀਨ ਆਪਰੇਸ਼ਨਾਂ ਤੋਂ ਇਲਾਵਾ ਉੱਚ ਤੀਬਰਤਾ ਵਾਲੀਆਂ ਸਥਿਤੀਆਂ ਵਿੱਚ ਲੀਡਰਸ਼ਿਪ ਦੀ ਸਿਖਲਾਈ ਦਿੱਤੀ ਜਾਂਦੀ ਹੈ। ਇਸੇ ਕਰਕੇ ਇਸ ਸੰਸਥਾ ਨੂੰ ਭਾਰਤੀ ਹਵਾਈ ਫ਼ੌਜ ਦੇ ਸਭ ਤੋਂ ਉੱਚ ਪੱਧਰੀ ਫਾਈਟਰ ਟ੍ਰੇਨਿੰਗ ਕੇਂਦਰਾਂ ਵਿੱਚ ਗਿਣਿਆ ਜਾਂਦਾ ਹੈ।

ਬਿਹਾਰ ਦੇ ਦਰਭੰਗਾ ਜ਼ਿਲ੍ਹੇ ਨਾਲ ਸਬੰਧਤ ਭਾਵਨਾ ਕਾਂਤ 2016 ਵਿੱਚ ਦੇਸ਼ ਦੀਆਂ ਪਹਿਲੀਆਂ ਤਿੰਨ ਮਹਿਲਾ ਫਾਈਟਰ ਪਾਇਲਟਾਂ ਵਿੱਚ ਸ਼ਾਮਲ ਹੋਈ ਸੀ। ਉਨ੍ਹਾਂ ਦੇ ਬੈਚ ਵਿੱਚ ਅਵਨੀ ਚਤੁਰਵੇਦੀ ਅਤੇ ਮੋਹਨਾ ਸਿੰਘ ਵੀ ਸ਼ਾਮਲ ਸਨ।

ਭਾਵਨਾ ਕਾਂਤ ਨੇ ਆਪਣੇ ਕਰੀਅਰ ਦੌਰਾਨ ਕਈ ਮਹੱਤਵਪੂਰਨ ਉਪਲਬਧੀਆਂ ਹਾਸਲ ਕੀਤੀਆਂ ਹਨ। 2019 ਵਿੱਚ ਉਹ ਦਿਨ ਦੇ ਸਮੇਂ ਫਾਈਟਰ ਕੰਬੈਟ ਮਿਸ਼ਨ ਲਈ ਯੋਗਤਾ ਹਾਸਲ ਕਰਨ ਵਾਲੀਆਂ ਪਹਿਲੀਆਂ ਭਾਰਤੀ ਮਹਿਲਾ ਫਾਈਟਰ ਪਾਇਲਟਾਂ ਵਿੱਚ ਸ਼ਾਮਲ ਰਹੀ। ਉਨ੍ਹਾਂ ਨੇ MiG-21 Bison ਉਡਾਇਆ ਅਤੇ ਬਾਅਦ ਵਿੱਚ Su-30MKI ’ਤੇ ਵੀ ਸੇਵਾ ਨਿਭਾਈ।

2021 ਵਿੱਚ ਭਾਵਨਾ ਕਾਂਤ ਗਣਤੰਤਰ ਦਿਵਸ ਪਰੇਡ ਵਿੱਚ ਹਿੱਸਾ ਲੈਣ ਵਾਲੀ ਪਹਿਲੀ ਮਹਿਲਾ ਫਾਈਟਰ ਪਾਇਲਟ ਬਣੀ। ਇਸ ਤੋਂ ਬਾਅਦ 2024 ਦੇ ਗਣਤੰਤਰ ਦਿਵਸ ਫਲਾਈਪਾਸਟ ਵਿੱਚ ਵੀ ਉਨ੍ਹਾਂ ਨੇ ਹਿੱਸਾ ਲਿਆ।

ਉਨ੍ਹਾਂ ਦੀ ਇਹ ਨਵੀਂ ਉਪਲਬਧੀ ਭਾਰਤੀ ਹਵਾਈ ਫ਼ੌਜ ਵਿੱਚ ਮਹਿਲਾ ਅਧਿਕਾਰੀਆਂ ਲਈ ਵਧ ਰਹੇ ਮੌਕਿਆਂ ਅਤੇ ਉਨ੍ਹਾਂ ਦੀਆਂ ਵਧਦੀਆਂ ਜ਼ਿੰਮੇਵਾਰੀਆਂ ਨੂੰ ਦਰਸਾਉਂਦੀ ਹੈ।