ਆਕਲੈਂਡ : ਨਿਊਜ਼ੀਲੈਂਡ ਦੇ ਤਾਜ਼ਾ ਕਿਰਤ ਬਾਜ਼ਾਰ ਅੰਕੜਿਆਂ ਮੁਤਾਬਕ ਜੂਨ 2026 ਦੀ ਤਿਮਾਹੀ ਦੌਰਾਨ ਦੇਸ਼ ਦੀ ਮੌਸਮੀ-ਸਮਾਯੋਜਿਤ (Seasonally Adjusted) ਬੇਰੁਜ਼ਗਾਰੀ ਦਰ ਵੱਧ ਕੇ 5.6 ਫੀਸਦੀ ਹੋ ਗਈ ਹੈ, ਜੋ ਪਿਛਲੀ ਤਿਮਾਹੀ ਦੇ 5.4 ਫੀਸਦੀ ਦੇ ਮੁਕਾਬਲੇ ਵਾਧਾ ਦਰਸਾਉਂਦੀ ਹੈ।

ਸਰਕਾਰੀ ਅੰਕੜਿਆਂ ਅਨੁਸਾਰ, ਇਸ ਦੌਰਾਨ ਅੰਡਰ-ਯੂਟਿਲਾਈਜ਼ੇਸ਼ਨ (ਕੰਮ ਦੀ ਪੂਰੀ ਵਰਤੋਂ ਨਾ ਹੋਣਾ) ਦੀ ਦਰ 13.8 ਫੀਸਦੀ ਰਹੀ, ਜਦਕਿ ਕੁੱਲ ਰੁਜ਼ਗਾਰ ਵਿੱਚ ਤਿਮਾਹੀ ਅਧਾਰ ‘ਤੇ 0.5 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ। ਲੇਬਰ ਕਾਸਟ ਇੰਡੈਕਸ ਮੁਤਾਬਕ ਸਾਲਾਨਾ ਤਨਖ਼ਾਹ ਮਹਿੰਗਾਈ 2 ਫੀਸਦੀ ਰਹੀ ਅਤੇ ਔਸਤ ਪ੍ਰਤੀ ਘੰਟਾ ਕਮਾਈ 44.62 ਨਿਊਜ਼ੀਲੈਂਡ ਡਾਲਰ ਦਰਜ ਕੀਤੀ ਗਈ।

ਅੰਕੜੇ ਇਹ ਵੀ ਦਰਸਾਉਂਦੇ ਹਨ ਕਿ ਦੇਸ਼ ਵਿੱਚ ਕਰੀਬ 1,66,500 ਲੋਕ ਬੇਰੁਜ਼ਗਾਰ ਹਨ, ਜਿਨ੍ਹਾਂ ਵਿੱਚੋਂ ਲਗਭਗ 19 ਫੀਸਦੀ ਇੱਕ ਸਾਲ ਜਾਂ ਇਸ ਤੋਂ ਵੱਧ ਸਮੇਂ ਤੋਂ ਨੌਕਰੀ ਤੋਂ ਵਾਂਝੇ ਹਨ। ਪਿਛਲੇ ਸਾਲ ਦੇ ਮੁਕਾਬਲੇ ਲੰਬੇ ਸਮੇਂ ਤੋਂ ਬੇਰੁਜ਼ਗਾਰ ਲੋਕਾਂ ਦੀ ਗਿਣਤੀ ਵਿੱਚ ਕਰੀਬ 8,000 ਦਾ ਵਾਧਾ ਹੋਇਆ ਹੈ।

ਨੌਜਵਾਨ ਵਰਗ ਵਿੱਚ ਰੁਜ਼ਗਾਰ ਦੀ ਸਥਿਤੀ ਹੋਰ ਵੀ ਚਿੰਤਾਜਨਕ ਰਹੀ। 15 ਤੋਂ 24 ਸਾਲ ਦੀ ਉਮਰ ਦੇ ਨੌਜਵਾਨਾਂ ਵਿੱਚ ਅੰਡਰ-ਯੂਟਿਲਾਈਜ਼ੇਸ਼ਨ ਦਰ 33.6 ਫੀਸਦੀ ਤੋਂ ਵੱਧ ਕੇ 37 ਫੀਸਦੀ ਹੋ ਗਈ। ਇਸ ਉਮਰ ਵਰਗ ਵਿੱਚ ਅਜਿਹੇ ਨੌਜਵਾਨਾਂ ਦੀ ਗਿਣਤੀ ਇੱਕ ਸਾਲ ਦੌਰਾਨ 21,500 ਵਧੀ, ਜਿਸ ਵਿੱਚ ਸਭ ਤੋਂ ਵੱਡਾ ਯੋਗਦਾਨ ਬੇਰੁਜ਼ਗਾਰੀ ਦਾ ਰਿਹਾ।

ਇਸੇ ਤਰ੍ਹਾਂ 25 ਤੋਂ 34 ਸਾਲ ਦੇ ਵਰਗ ਵਿੱਚ ਵੀ ਅੰਡਰ-ਯੂਟਿਲਾਈਜ਼ੇਸ਼ਨ ਦਰ 9.7 ਫੀਸਦੀ ਤੋਂ ਵੱਧ ਕੇ 11.6 ਫੀਸਦੀ ਹੋ ਗਈ। ਇਸ ਵਰਗ ਵਿੱਚ ਘੱਟ-ਰੁਜ਼ਗਾਰ (Underemployment) ਦੀ ਸਮੱਸਿਆ ਵਧਣ ਕਾਰਨ ਪ੍ਰਭਾਵਿਤ ਲੋਕਾਂ ਦੀ ਗਿਣਤੀ ਵਿੱਚ ਵੀ ਉਲੇਖਣਯੋਗ ਵਾਧਾ ਦਰਜ ਕੀਤਾ ਗਿਆ।

ਰਿਪੋਰਟ ਅਨੁਸਾਰ, ਮਾਓਰੀ ਭਾਈਚਾਰੇ ‘ਤੇ ਵੀ ਇਸ ਦਾ ਖਾਸ ਅਸਰ ਪਿਆ ਹੈ। ਜੂਨ 2026 ਦੀ ਤਿਮਾਹੀ ਵਿੱਚ ਅੰਡਰ-ਯੂਟਿਲਾਈਜ਼ੇਸ਼ਨ ਨਾਲ ਪ੍ਰਭਾਵਿਤ ਲੋਕਾਂ ਵਿੱਚ 25.8 ਫੀਸਦੀ ਮਾਓਰੀ ਸਨ, ਜਦਕਿ ਇਸ ਭਾਈਚਾਰੇ ਦੀ ਅੰਡਰ-ਯੂਟਿਲਾਈਜ਼ੇਸ਼ਨ ਦਰ 22.8 ਫੀਸਦੀ ਰਹੀ, ਜੋ ਇੱਕ ਸਾਲ ਪਹਿਲਾਂ ਨਾਲੋਂ 3.2 ਪ੍ਰਤੀਸ਼ਤ ਅੰਕ ਵੱਧ ਹੈ।

ਮਾਹਿਰਾਂ ਦਾ ਮੰਨਣਾ ਹੈ ਕਿ ਰੁਜ਼ਗਾਰ ਬਾਜ਼ਾਰ ਵਿੱਚ ਆ ਰਹੇ ਇਹ ਬਦਲਾਅ ਨੌਜਵਾਨਾਂ ਅਤੇ ਕੁਝ ਖਾਸ ਭਾਈਚਾਰਿਆਂ ਲਈ ਚੁਣੌਤੀਆਂ ਨੂੰ ਉਜਾਗਰ ਕਰਦੇ ਹਨ ਅਤੇ ਆਉਣ ਵਾਲੇ ਸਮੇਂ ਵਿੱਚ ਰੁਜ਼ਗਾਰ ਸਿਰਜਣ ਅਤੇ ਹੁਨਰ ਵਿਕਾਸ ‘ਤੇ ਹੋਰ ਧਿਆਨ ਦੇਣ ਦੀ ਲੋੜ ਹੋਵੇਗੀ।