ਆਕਲੈਂਡ : ਭਾਰਤ ਵਿੱਚ ਉਸਾਰੀ ਅਤੇ ਬੁਨਿਆਦੀ ਢਾਂਚੇ ਦੇ ਤੇਜ਼ੀ ਨਾਲ ਹੋ ਰਹੇ ਵਿਸਥਾਰ ਕਾਰਨ ਨਿਊਜ਼ੀਲੈਂਡ ਦੀ ਇਮਾਰਤੀ ਲੱਕੜ ਦੀ ਮੰਗ ਵਿੱਚ ਲਗਾਤਾਰ ਵਾਧਾ ਦਰਜ ਕੀਤਾ ਜਾ ਰਿਹਾ ਹੈ। ਇਸ ਕਾਰਨ ਨਿਊਜ਼ੀਲੈਂਡ ਦੇ ਜੰਗਲਾਤ ਅਤੇ ਲੱਕੜ ਕਾਰੋਬਾਰ ਨਾਲ ਜੁੜੇ ਉਦਯੋਗਾਂ ਲਈ ਨਵੇਂ ਵਪਾਰਕ ਮੌਕੇ ਪੈਦਾ ਹੋ ਰਹੇ ਹਨ।
ਨਿਊਜ਼ੀਲੈਂਡ ਟਰੇਡ ਐਂਡ ਐਂਟਰਪ੍ਰਾਈਜ਼ (NZTE) ਵੱਲੋਂ ਜਾਰੀ ਜਾਣਕਾਰੀ ਅਨੁਸਾਰ, 2024 ਤੋਂ ਬਾਅਦ ਭਾਰਤ ਨੂੰ ਕੀਤੀ ਜਾਣ ਵਾਲੀ ਲੱਕੜ ਦੀ ਬਰਾਮਦ ਵਿੱਚ ਮਹੱਤਵਪੂਰਨ ਵਾਧਾ ਹੋਇਆ ਹੈ। ਪਹਿਲਾਂ ਨਿਊਜ਼ੀਲੈਂਡ ਤੋਂ ਰੇਡੀਏਟਾ ਪਾਈਨ ਦੇ ਲੌਗਸ ਮੁੱਖ ਤੌਰ ‘ਤੇ ਪੈਕਿੰਗ ਸਮੱਗਰੀ ਲਈ ਭੇਜੇ ਜਾਂਦੇ ਸਨ, ਪਰ ਹੁਣ ਇਸ ਲੱਕੜ ਦੀ ਵਰਤੋਂ ਇਮਾਰਤਾਂ, ਆਧੁਨਿਕ ਨਿਰਮਾਣ ਅਤੇ ਇੰਜੀਨੀਅਰਡ ਵੁੱਡ ਉਤਪਾਦਾਂ ਵਿੱਚ ਵੀ ਵੱਡੇ ਪੱਧਰ ‘ਤੇ ਹੋ ਰਹੀ ਹੈ।
ਮੌਜੂਦਾ ਸਮੇਂ ਨਿਊਜ਼ੀਲੈਂਡ ਤੋਂ ਭਾਰਤ ਆਉਣ ਵਾਲੇ ਲੱਕੜ ਉਤਪਾਦਾਂ ‘ਤੇ 5.5 ਤੋਂ 11 ਫੀਸਦੀ ਤੱਕ ਦਰਾਮਦੀ ਸ਼ੁਲਕ ਲੱਗਦਾ ਹੈ। ਦੋਵਾਂ ਦੇਸ਼ਾਂ ਵਿਚਕਾਰ ਪ੍ਰਸਤਾਵਿਤ ਮੁਕਤ ਵਪਾਰ ਸਮਝੌਤਾ (FTA) ਲਾਗੂ ਹੋਣ ਤੋਂ ਬਾਅਦ ਲਗਭਗ 95 ਫੀਸਦੀ ਉਤਪਾਦਾਂ ‘ਤੇ ਇਹ ਸ਼ੁਲਕ ਖਤਮ ਹੋ ਸਕਦਾ ਹੈ, ਜਿਸ ਨਾਲ ਵਪਾਰ ਨੂੰ ਹੋਰ ਗਤੀ ਮਿਲਣ ਦੀ ਸੰਭਾਵਨਾ ਹੈ।
NZTE ਨੇ ਆਪਣੇ ਨਿਰਯਾਤਕਾਂ ਨੂੰ ਸਲਾਹ ਦਿੱਤੀ ਹੈ ਕਿ ਉਹ ਭਾਰਤੀ ਆਰਕੀਟੈਕਟਾਂ, ਇੰਜੀਨੀਅਰਾਂ, ਡਿਵੈਲਪਰਾਂ ਅਤੇ ਖਰੀਦਦਾਰਾਂ ਨਾਲ ਸਿੱਧਾ ਸੰਪਰਕ ਵਧਾਉਣ ਅਤੇ ਰੇਡੀਏਟਾ ਪਾਈਨ ਦੀ ਗੁਣਵੱਤਾ ਅਤੇ ਇਸ ਦੇ ਫਾਇਦਿਆਂ ਬਾਰੇ ਜਾਣਕਾਰੀ ਦੇਣ। ਸੰਸਥਾ ਦਾ ਮੰਨਣਾ ਹੈ ਕਿ ਭਾਰਤ ਵਿੱਚ ਆਯਾਤ ਹੋਣ ਵਾਲੀ ਲੱਕੜ ਦਾ ਵੱਡਾ ਹਿੱਸਾ ਅਜੇ ਵੀ ਕੱਚੇ ਰੂਪ ਵਿੱਚ ਆਉਂਦਾ ਹੈ, ਜਦਕਿ ਉੱਚ ਗੁਣਵੱਤਾ ਵਾਲੇ ਤਿਆਰ ਲੱਕੜ ਉਤਪਾਦਾਂ ਲਈ ਵੱਡਾ ਬਾਜ਼ਾਰ ਮੌਜੂਦ ਹੈ।
ਰਿਪੋਰਟ ਵਿੱਚ ਇਹ ਵੀ ਕਿਹਾ ਗਿਆ ਹੈ ਕਿ ਭਾਰਤ ਦੇ ਵੱਖ-ਵੱਖ ਰਾਜਾਂ ਦੇ ਨਿਯਮਾਂ ਅਤੇ ਲੱਕੜ ਦੀ ਸੁਰੱਖਿਆ ਨਾਲ ਜੁੜੀਆਂ ਚੁਣੌਤੀਆਂ ਨੂੰ ਧਿਆਨ ਵਿੱਚ ਰੱਖਦਿਆਂ, ਨਿਰਯਾਤਕਾਂ ਨੂੰ ਸੀਜ਼ਨਿੰਗ ਅਤੇ ਟਰਮੀਟ-ਰੋਧੀ ਟਰੀਟਮੈਂਟ ਵਰਗੇ ਮਿਆਰੀ ਪ੍ਰਬੰਧ ਅਪਣਾਉਣੇ ਚਾਹੀਦੇ ਹਨ।
ਮਾਹਿਰਾਂ ਦਾ ਮੰਨਣਾ ਹੈ ਕਿ ਦਰਵਾਜ਼ਿਆਂ, ਖਿੜਕੀਆਂ, ਫਰਨੀਚਰ, ਹੋਟਲਾਂ, ਰਿਜ਼ੋਰਟਾਂ, ਰਿਹਾਇਸ਼ੀ ਪ੍ਰੋਜੈਕਟਾਂ ਅਤੇ ਹੋਰ ਵੱਡੀਆਂ ਉਸਾਰੀ ਯੋਜਨਾਵਾਂ ਵਿੱਚ ਨਿਊਜ਼ੀਲੈਂਡ ਦੀ ਇਮਾਰਤੀ ਲੱਕੜ ਲਈ ਆਉਣ ਵਾਲੇ ਸਮੇਂ ਵਿੱਚ ਮੰਗ ਹੋਰ ਵਧ ਸਕਦੀ ਹੈ, ਜਿਸ ਨਾਲ ਦੋਵਾਂ ਦੇਸ਼ਾਂ ਵਿਚਕਾਰ ਲੱਕੜ ਦੇ ਵਪਾਰ ਨੂੰ ਨਵੀਂ ਰਫ਼ਤਾਰ ਮਿਲੇਗੀ।